Lagarta, Lagarta foi unha empresa de produción teatral nacida en 2001 por iniciativa de Ernesto Chao e Rosa Álvarez, dous actores de longa traxectoria en Galicia, onde a compañía tivo a súa sede e realizou principalmente a distribución dos seus espectáculos.
De ter que definila en poucas palabras diríase que foi unha compañía de actores, nacida co espírito de facer espectáculos que moitos intérpretes agardan e aos que desexan enfrontarse, pero que por diversas circunstancias non se podían levar a escena no seu día. Foi, polo tanto, unha compañía aberta a todas aquelas propostas interesantes que puideran xurdir, e non necesariamente no seu propio seo.
Éste é un dos motivos polos que a compañía non contaba cun plantel fixo de profesionais (dirección, intérpretes, deseños, etc.) Lagarta, Lagarta era unha “empresa de actores”, que mudaba de director/a e equipo artístico en función do espectáculo.

Entre os seus espectáculos máis destacados están “Aeroplanos”, “O segredo dos Hoffman”, “Cásting (a comedia)” ou “Unha hora na vida de Stefan Zweig”.

Ernesto Chao foi durante varios anos presidente de Escena Galega.