Ancora Producións naceu en 1989 a partir dunha coincidencia de criterios artísticos e de investigación de Anxela G. Abalo e Gustavo Pernas Cora.

Investigaron no espazo do teatro nesta "sociedade do espectáculo", telecomunicada e hiperinformada pero sen lugar para intervalos onde aflore o coñecemento e a diferenza, onde o corpo se comunique a escala humana, a medida da voz e o xesto.

Ancora Producións, ancorada en Galicia, mergullada na néboa que procura a indeterminación e a ambigüidade do que se ve e se nomea, levou ao teatro desde a palabra á súa tradución escénica, ás repeticións recorrentes, ás frases inconclusas, aos puntos suspensivos, aos monólogos e soliloquios, á ironía e fantasía que nacen nesta paisaxe concreta que nos dá identidade e identifícanos como fillos de Samuel Beckett. En Galicia, como en Irlanda, o verdadeiramente moderno ancórase no tradicional, máis aló dos costumes, no clima e na terra mesma.

Algúns dos seus espectáculos foron “Snakizados -Comedia da fin do Mundo-“, “Colgados” ou “Pisados, Botamán de Melide o home que falaba cos zapatos.”