Poñemos en marcha ACOMPAÑA, o novo proxecto de consultoría e acompañamento da acción profesional para compañías asociadas a Escena Galega

ESCENA GALEGA (Asociación Galega de Empresas de Artes Escénicas) presta nos últimos anos unha atención especial ao eido da formación continua, entendendo esta como un máis dos servizos que unha entidade das súas características debe ofertar ás súas asociadas e aos seus asociados. O programa formativo anual perfílase segundo as necesidades e intereses detectados no seo da asociación, sexa por peticións directas, observación ou por medio das enquisas de valoración das distintas accións específicas.

Que é Acompaña

Dende a Asociación vimos detectando que o formato de programación de cursos e obradoiros específicos estaba dalgunha maneira esgotado, pero ao mesmo tempo existen nas compañías novas necesidades que teñen que ver máis co acompañamento dos proxectos empresariais en distintos aspectos de desenvolvemento e xestión. Polo tanto, o plan deste ano 2022, no XX aniversario da asociación, é tornar este programa de formacións monográficas e curtas nun proxecto de acompañamento e consultoría personalizado e perfilado segundo as necesidades das compañías que queiran desfrutar del, por medio de xuntanzas e seguimento cun grupo de consultoría formado por destacados/as profesionais no plano galego e estatal nas seguintes áreas de acción: Xestión económica e empresarial, Comunicación e Distribución 

Cando terá lugar?

O proceso deste proxecto de consultoría e acompañamento das socias de Escena Galega estará aberto durante 7 meses ou ata o esgotamento da bolsa de horas dispoñible, puidendo empregar cada compañía un total de 15 horas do programa. 

Quen conforma o equipo consultor?

XESTIÓN ECONÓMICA E EMPRESARIAL

Equipo consultor: Fernando Piñeiro e José María Rodríguez Losada

• Fernando Piñeiro. Fernando é diplomado en Ciencias Empresariais e Licenciado en Ciencias Económicas e Empresariais pola Universidade da Coruña. Posgraduado en Coaching Persoal e de Equipos e Certificado pola International Coaching Community. A meirande parte da súa vida profesional está vencellada co emprendemento e o desenvolvemento local en distintas Administracións Públicas, tanto Autonómicas (Igape), provinciais e municipais. No ámbito da consultoría, dende o ano 2013 vén traballando no eido do desenvolvemento local e a creación de empresas, centrándose nunha parte máis empresarial como asesor ou mentor de proxectos empresariais en distintos sectores, así coma en determinados proxectos europeos, e tamén noutra parte formativa con diferentes Administracións e Organismos Públicos.
• José María Rodríguez Losada. José María é enxeñeiro e Graduado Social, Licenciado en Ciencias do Traballo, Máster MBA en Dirección Empresarial, Coach Executivo e de Equipos. É formador, profesor, consultor e mentor de proxectos empresariais na área de emprendemento principalmente, dirixido a Pemes, profesionais autónomos e microempresas de calquera sector empresarial, Cámaras de Comercio, Confederacións de Empresarios,ou Escolas de 5 Negocio. Como consultor ofrece as respostas axeitadas aos fins que o propio cliente pretenda acadar. E como mentor trata de ser un guía, compartir as propias experiencias e coñecementos. 

COMUNICACIÓN

Equipo consultor: Lucía Martínez, Lucía Pita e Luisa Castiñeira (The Office Comunicación)

• Lucía Martínez. Lucía é xornalista e consultora de comunicación enfocada na contorna dixital. Tras dez anos de experiencia en medios como TVE ou a Axencia EFE, especialízase no eido da estratexia dixital, a comunicación en liña e as redes sociais, e comeza a xestionar a mensaxe de marcas, empresas e institucións na rede. Desde 2015 forma parte de The Office como responsable do equipo de comunicación dixital, dirixindo esta parte de proxectos culturais como o Festival de Otoño, Madrid en Danza, FIOT, Camino Escena Norte, Cineuropa, a Semana do Cinema Galego, Elefante Elegante, ButacaZero, o Festival Noroeste Estrella Galicia, Sinsal ou Momentos Alhambra Acustiquísimos, entre outros. Lucía Pita é tamén xornalista e consultora de comunicación. Inicia a súa traxectoria en redaccións de ámbito estatal para despois desenvolver campañas como responsable de medios sociais no ámbito do lecer e da cultura en Galicia. Entre os anos 2015 e 2019 traballa no Gabinete de Prensa do Concello da Coruña e regresa en 2019 a The Office. Desde entón, forma parte do equipo de prensa de proxectos como Sinsal, FIOT, Camino Escena Norte, Fanzine Fest, SonRías Baixas, EHMU ou Cineuropa; compañías 7 como Voadora & Marta Pazos, ButacaZero ou Elefante Elegante; e de grupos como Tanxugueiras, Sés, Mercedes Peón ou Xisco Feijoó.
• Luisa Castiñeira. Luisa é xornalista e consultora de comunicación especializada en cultura e artes escénicas. Logo de traballar como editora e redactora no diario El Mundo durante cinco anos, nos últimos quince dirixe e desenvolve campañas de comunicación para proxectos como Festival de Otoño (no que exerce de xefa de prensa durante 12 edicións), Madrid en Danza, Escena Contemporánea, MIT Ribadavia, FIOT, Teatros del Canal, Conde Duque Madrid, Teatro Quique San Francisco, Festival Noroeste Estrella Galicia, Voadora, ButacaZero, Elefante Elegante ou El Pavón Teatro Kamikaze, entre outras iniciativas culturais

DISTRIBUCIÓN

Consultora: Nines Carrascal

• Nines Carrascal é Licenciada en Historia Contemporánea e Máster en Xestión Cultural, Música, Teatro e Danza (ICCMU) A súa traxectoria profesional comeza no ano 1995 no ámbito da produción e distribución de artes escénicas coa compañía Histrión Teatro, coa que leva producidos máis de 20 espectáculos. Anos despois crea Escena Granada Distribución e traballa con compañías como a Companhia do Chapitô, Producciones Imperdibles, Johan Lorbeer ou El Gran Dimitri. Como docente imparte numerosos talleres de distribución e participa como ponente en foros e encontros do sector. Dirixiu diversos estudos de investigación e actualmente é a comisaria de MERCARTES.