Escena Galega renova a súa colaboración con Cafés Candelas como patrocinadora oficial da actividade da sectorial por segundo ano consecutivo

Escena Galega -a asociación de Empresas de Artes Escénicas de Galicia- e Cafés Candelas continúan a súa andaina xuntas. Por segundo ano consecutivo, a empresa cafeteira lucense será a patrocinadora oficial da actividade da asociación sectorial. O convenio, asinado nos últimos días, celébrase con café na nova sede de EG no Centro de Emprendemento da Cidade da Cultura. 

As instalacións, que son a nova central de mandos da asociación dende vai uns meses, contan cun pequeno recuncho de café que acompaña ao persoal da asociación en todas as liñas de traballo que a entidade promove e das que forma parte. Dende Escena Galega, queremos novamente agradecer á marca o seu patrocinio e presenza nas distintas actividades da asociación, co seu café presente en iniciativas como Galicia Escena PRO, as xornadas profesionais anuais ou a xornada de promoción escénica e musical que cada ano promovemos en colaboración con AGEM. Brindamos un ano máis con Cafés Candelas: grazas pola confianza depositada e o apoio ás artes escénicas de Galicia.