A compañía
Chévere é unha compañía de axitación teatral con 38 anos de traballo ao lombo. En 2014 recibe o Premio Nacional de Teatro polo seu compromiso social e cultural e coherente traxectoria de creación colectiva, transgresión de xéneros e conexión crítica coa realidade.
Entre 1992-2011 mantén aberta a Nave de Servizos Artísticos-Sala Nasa.
Desde 2005 diversifica o seu teatro de operacións, participa en proxectos audiovisuais, executa innovadores proxectos de creación en internet, investiga na ficción sonora e converte o teatro nunha ferramenta de divulgación e sensibilización social.
Entre 2012-2019 desenvolve un proxecto de residencia teatral no concello de Teo, completando as súas obras cun programa de integración na comunidade.
En 2015 pon en marcha a Berberecheira, iniciativa de custodia do territorio teatral e laboratorio de creación escénica para sementar proxectos alleos.
Desde 2023 integra nas súas obras a lingua de signos e a audiodescrición á procura dun teatro máis accesible.
