As xornadas profesionais de Escena Galega celebraranse este ano no Pazo da Cultura de Carballo en colaboración co programa A Cultura É Un Dereito da Deputación da Coruña

As xornadas profesionais de Escena Galega celebraranse este ano no Pazo da Cultura de Carballo en colaboración co programa A Cultura É Un Dereito da Deputación da Coruña

Serán o vindeiro 20 de decembro e tratarán os Retos do Asociacionismo Profesional como un dos eixos vertebradores do sector escénico galego. Poden inscribirse profesionais ata o próximo día 18

Escena Galega (Asociación Galega de Empresas de Artes Escénicas) cumpre este 2022 vinte anos de traballo ininterrompido en prol do sector escénico profesional, e neste ano tan sinalado a Deputación da Coruña colabora coa nosa entidade centrándos dentro do programa A Cultura É Un Dereito na situación do tecido escénico profesional dende o punto de vista do seu asociacionismo como un dos seus eixos vertebradores.

Nesta data sinalada, e no contexto sempre cambiante e cheo de desafíos no que parecemos acostumados e acostumadas a vivir nos últimos anos, queremos reflexionar, debater e compartir por tanto inquedanzas sobre algunhas das cuestións máis importantes para que o sector escénico profesional galego sexa máis sustentable, plural, aberto e relacionado co seu contexto social, económico e cultural.

Como mellorar a circulación escénica profesional no territorio, poñendo o foco nos contextos non urbanos tamén como unha forma de achegar non só a oferta senón a acción cultural ás vilas pequenas e medias, como artellar estratexias entre o sector creativo e o empresarial-produtivo para acadar posibilidades reais de extender as políticas de responsabilidade social das empresas tamén ao noso eido ou como traballar sobre as propostas de acción comarcalizada entre concellos pequenos que poidan reforzar a súa acción cultural de cara á cidadanía son algúns dos temas que tocaremos nesta xornada.

Tamén falaremos das asociacións profesionais, entendendo estes colectivos como parte fundamental non só do desenvolvemento senón tamén do sostemento do sector cultural galego, exemplo de vertebración, debatendo con compañeiras e compañeiros doutros ámbitos dentro das nosas fronteiras, e tamén do resto do Estado, co convite ás nosas entidades parceiras en Madrid, Cataluña e Euskadi.

Os eixos temáticos da xornada son:

  • Necesidade da acción combinada entre administracións para a xeración de proxectos de política cultural: democracia cultural, atención á oferta cultural en contextos rurais, estratexias de estabilidade para o sector creativo e de relación deste co seu contexto (cidadanía).
  • O financiamento privado (mecenado, patrocinio) de proxectos escénicos, posibles estratexias entre o sector creativo e o produtivo.
  • Comarcalización como vía para unha acción escénica más sustentable (residencias de creación, circulación, relación co contexto social...).
  • Retos de mellora na circulación escénica profesional en Galicia, centrada no achegamento da oferta e acción cultural especificamente a contextos non urbanos.
  • O rol do asociacionismo na vertebración do tecido profesional e creativo.
  • Eixo transversal: sostibilidade do sector a medio e longo prazo (económica, sistémica e de relación coa cidadanía).

A sesión desenvólvese grazas á colaboración da área de cultura da Deputación da Coruña e está comisariada polo noso xerente, Diego V. Meizoso. 

Pode realizarse a inscrición de profesionais a través desta ligazón ata o vindeiro 18 de decembro. 

© Escena Galega. Todos os dereitos reservados. Deseño: Diego Seixo.