Escena Galega fixo entrega dos Recoñecementos Escena Galega das Artes Escénicas 2025 Escena Galega fixo entrega dos Recoñecementos Escena Galega das Artes Escénicas 2025
Estes galardóns de carácter non competitivo xa suman tres edicións e pretenden poñer en valor a contribución de compañías, entidades e outras profesionais á escena galega
O pasado 8 de outubro de 2025 compartimos un xantar íntimo e distendido na cafetaría da Cidade da Cultura e fixemos entrega dos Recoñecementos Escena Galega das Artes Escénicas 2025.
Socia de Honra de Escena Galega 2025: Talía Teatro
Con máis de 37 anos ás costas, a compañía Talía Teatro é socia fundadora de Escena Galega. É unha das empresas teatrais con máis percorrido no panorama teatral galego. Ademais das súas destacadas propostas artísticas Talía Teatro destaca por un modelo empresarial sólido e singular.
Recoñecemento Escena Galega 2025 "ao labor transformador nas artes escénicas": A Panadaría
Creada ao abeiro da ESAD de Galicia, A Panadaría serviu de exemplo para moitas alumnas polo seu bo facer. O seu labor destaca principalmente pola defensa dos dereitos das mulleres e do colectivo LGTBIQ+ desde un punto de vista orixinal e divertido. Un elemento este que serviu para transformar as artes escénicas actuais en Galicia.
Recoñecemento Escena Galega 2025 á traxectoria "toda unha vida a sachar": Miguel Soto - RTA (Recursos Técnicos Artísticos)
Sempre presente e sempre disposto a botar unha man. A evolución técnica nas artes escénicas en Galicia non ser podería levar a cabo sen a súa figura. Mentor de moitos profesionais é unha das figuras fundamentais do panorama teatral galego. Unha referencia.
Recoñecemento Escena Galega 2025 "ao proxecto de resistencia nas artes escénicas": A Artística - Vigo
A Artística recibe o premio por ser un lugar de nexo artístico. Un lugar que serviu para formar a moitas profesionais das artes escénicas cando non existían estudos regrados. Un espazo no que fomentan a creación escénica contemporánea e a investigación artística. A Artística resiste como resiste a arte a pesar das trabas que nos poñan polo camiño.
Recoñecemento Escena Galega 2025 "a facernos visibles": Ana Romaní
Xornalista e Poeta, Ana Romaní recibe o recoñecemento por facernos visibles. Grazas a súa participación no "Diario Cultural", Ana fixo e fai visible a arte escénica profesional para o gran público dende os anos 90. Un exemplo no trato e no coñecemento do noso sector agardamos que a súa labor poda continuar durante moitos anos máis.
Recoñecemento Escena Galega 2025 "á riquiñez e ao bo trato": Copi Villaamil (animadora sociocultural do Concello de Neda)
Natividad Villaamil ou a tamén coñecida como "Copi" de Neda leva este recoñecemento polo seu bo facer, polo bo trato ás compañías e pola súa maneira de traballar: sempre dispoñible e sempre atenta para responder as necesidades das nosas empresas.
A peza dos recoñecementos
Tal e como se estipulou na primeira edición deste evento, Escena Galega encarga cada ano a peza física dos recoñecementos a distintas creadoras e creadores galegos, dándolles total liberdade para que o recoñecemento sexa orixinal e diferente en cada edición. Este ano asumiu a encarga Pepe Penabade, que sorprendeu aos premiados cunha estatuíña feita con guiadores de bicicletas.
Vídeo resumo
https://www.youtube.com/watch?v=ob_eAdeFWm0&t=17s
E aquí podes ver o álbum completo coas fotografías do evento.
https://www.facebook.com/media/set/?set=a.1395183229275320&type=3